كل شخص عندو شي او مجموعه اشياء تخليه مبسوط وسعيد
سفر، جمعه عائليه، شكولا ،كوب شاي ، كوفي ، جلسه ع البحر ،جلسه في مطعم ،
البعض يتخيل انو عشان اكون سعيد ومرتاح البال لازم يكون عندي اشياء فخمه وغاليه السعاده تنبع من داخلك وتكون بالكيف مو بالكم كيف اقدر اسعد نفسي ترا تقدري تسعدي نفسك بأشياء بسيطه وطبعا اهم شي انو تكوني قريبه من ربك سبحان الله كنت الاحظ الايام الي انشغل فيها بالحياه تتعب نفسيتي وبس ارجع استغفر واسبح واسوي جدولي الخاص احس براحه عجيبه وسعاده مااعرف ايش سببها بس من جوا في شي يقول انا مبسووووطه انا سعيييده رغم اني اكون اليوم الي قبل زعلانه من شي او متوتره وكل اموري تتيسر الحمدالله ..وتاني شي تفائلي لاتفكري بأشياء تخليك متشائمه وبالك مشغول ومشوش ماراح يسير شي غير الي ربك كاتبه فليش تضيعي يوم من عمرك تفكري بشي امكن يسير وامكن لا
عن نفسي وقتي الخاص احب اقضيه في اشياء تجعلني ارجع كلي حيويه لاستقبال اسبوع حافل بالمسؤوليات اول الاشياء الي تسعدني انو اشوف موفي او مسلسل
وكوب شاي احمر بنعناع مديني ومعاه اي شي ع حسب المود احيانا اشتهي مالح واحيانا اشتهي شي حلوو
قهوه عربي مع شكوووولا قطعه منها كافيه في قلب مزاجي
من الاشياء الي تغير نفسيتي اجتمع مع اخواتي اطلع استراحه اقرأ مجلات واشوف منتجات جديده واحطها في قائمه مشترياتي المستقبليه او اتفرج ع برنامج جمالي ميك اب او فاشن او عنايه ومن الاشياء الي احبها اني اروح صيدليه دايما اروح واخد فكره عن المنتجات الجديده واخد الي محتاجته
ان توصلني هديه من شخص احس ان اخد من وقتو وفكر فيا
الصوره تصوير عشوائي في العيد من اجمل الهدايا الي وصلتني
كمان في روائح تعدل المزااج :عن نفسي احب ريحه البخوور والنعناع المديني والورد المديني ومويه الورد وعطري المفضل (سينما)
وريحه المطر وريحه المعمول
يذكرني بليله العيد في بيت اهلي والي في الصوره من صنعي في العيد الي راح كان لذيييذ جدااا
وانتو حاولو تجلسو مع نفسكم جلسه صفاء وتشوفو ايش الاشياء الي ممكن تغير مزاجكم وتخليكم مبسوطين
كوني ايجابيه حبي الحياه وحبي نفسك واحترميهااا حبي الناس قدمي المساعده الي تقدري عليها لاي احد محتاج لك ابعدو عن السلبين وكثيرين التشكي
اراكم ع خير وسعاده
الصور الي في الموضوع تصويري اتمنى مااحد يستخدمها لاي غرض
ليست هناك تعليقات:
إرسال تعليق